მეორე ხარისხის AV-ბლოკადა 2:1 ტიპის

კლინიკური გამოვლინება

  • ეკგ-ზე ყოველი მეორე P კბილი არ ტარდება პარკუჭებისკენ (არ მოსდევს QRS კომპლექსი).

  • შეიძლება ბლოკადის სხვა ხარისხებთან ერთად აღინიშნებოდეს.

  • შეიძლება იყოს როგორც ასიმპტომური, ასევე განაპირობოს ჰიპოპერფუზიით გამოწვეული სიმპტომები.


სიძნელეები

  • პრესინკოპეს ან სინკოპეს არსებობისას 2:1 ბლოკადის აღმოჩენამ უნდა გვაფიქრებინოს ბლოკადის უფრო მაღალი ხარისხის არსებობაც პერიოდულად.

  • შეუძლებელია მექანიზმის (მობიც I თუ მობიც II) დადგენა, თუ ბლოკადის სახე არ ცვალებადობს.

  • საჭიროა სრულყოფილი გამოკვლევა, რათა დადგინდეს ეტიოლოგია.


დიფერენციული დიაგნოსტიკა

  • თუ ბლოკირებული P კბილები წინა კომპლექსის T კბილებშია ჩამალული, შეიძლება ეს რიტმი სინუსურ ბრადიკარდიაში აგვერიოს. საჭიროა ST სეგმენტის დეტალური ანალიზი მასში ჩამალული P კბილების გამოსავლენად.

  • ბლოკირებული წინაგულოვანი ექსტრასისტოლია (ბიგემინია): აქ შეგვიძლია გავარჩიოთ სინუსურისგან განსხვავებული P’ კბილები. გარდა ამისა PP’ ინტერვალი მნიშვნელოვნად მცირეა P’P ინტერვალზე.


მკურნალობა

  • მწვავე მკურნალობა: საჭიროა პაციენტის ჰოსპიტალიზაცია და გამოკვლევა, რათა დადგინდეს ეტიოლოგია და მექანიზმი. სიმპტომების არსებობის შემთხვევაში საჭიროა დროებითი კარდიოსტიმულატორის იმპლანტაცია. შენიშვნა: ატროპინმა შეიძლება გაზარდოს ბლოკადის ხარისხი წინაგულების სიხშირის გაზრდის გამო.

  • გრძელვადიანი მკურნალობა: თუ ბლოკადა შექცევადი მიზეზით არ არის გამოწვეული, საჭიროა მუდმივი პეისმეიკერის იმპლანტაცია.

 

©2018 by Giorgi Papiashvili. Proudly created with Wix.com