მესამე ხარისხის (სრული) AV-ბლოკადა

კლინიკური გამოვლინება

  • ეკგ-ზე არცერთი P კბილი არ ტარდება პარკუჭებისკენ, რის გამოც გამოხატულია ავ-დისოციაცია ანუ არ არსებობს კავშირი წინაგულების და პარკუჭების რიტმს შორის (წინაგულების სიხშირე მეტია პარკუჭების სიხირეზე).

  • პარკუჭოვანი ჩანაცვლებითი რიტმის კომპლექსები შეიძლება ვიწრო (სუპრაჰისური წარმოშობის) ან ფართო (ინფრაჰისური წარმოშობის) იყოს.

  • კლინიკურად ვლინდება სინკოპეთი, ჰაერის უკმარისობით, სტენოკარდიით, ადვილად დაღლით, საუღლე ვენურ პულსზე ქვემეხისებრი ტალღებით.


სიძნელეები

  • დიაგნოზის დასმა ადვილია ეკგ-ის ანალიზით. მნიშვნელოვანია დავადგინოთ, არსებობს თუ არა კავშირი წინაგულებსა და პარკუჭებს შორის.

  • შეიძლება თან ახლდეს წინაგულთა ფიბრილაციას ან თრთოლვას, რომლის დროსაც P კბილებს ვერ ვნახავთ, თუმცა უჩვეულოდ ნელი და რეგულარული პარკუჭოვანი რიტმის არსებობამ უნდა გვაფიქრებინოს სრულ ავ-ბლოკადაზე.


დიფერენციული დიაგნოსტიკა

  • უფრო დაბალი ხარისხის ავ-ბლოკადა (განსაკუთრებით ვენკებახის ტიპის): სრული ავ-ბლოკადის დროს არ არის არანაირი კავშირი წინაგულოვან და პარკუჭოვან რიტმებს შორის.

  • მაღალი ხარისხის ავ-ბლოკადა: ზოგიერთი P კბილი ტარდება.

  • სინუსური ბრადიკარდია უფრო სწრაფი კვანძოვანი ჩანაცვლებითი რიტმით: შეიძლება შეგვხვდეს ატროპინის ან იზოპროტერენოლის შეყვანის შემდეგ. ავ-დისოციაცია სრული არ არის, რადგან ზოგიერთი P კბილი მაინც ტარდება პარკუჭებისკენ.


მკურნალობა

  • წარმოადგენს სასიცოცხლოდ საშიშ მდგომარეობას. ასისტოლიის გახანგრძლივებულმა ეპიზოდებმა შეიძლება უეცარი სიკვდილი გამოიწვიოს. ბრადიკარდიის ფონზე QT ინტერვალის გახანგრძლივებამ შეიძლება ხელი შეუწყოს “torsade de pointes” ტიპის პარკუჭოვანი ტაქიკარდიის განვითარებას.

  • მწვავე მკურნალობა: საჭიროებს პაციენტის ჰოსპიტალიზაციას. თუ ასიმპტომურია, ესაჭიროება რიტმის კონტროლი, თუმცა თუ გულისცემის სიხშირე <40’ ან პარკუჭოვანი ჩანაცვლებითი რიტმი ფართო QRS-ით მიდის, საჭიროა დროებითი სტიმულატორის ჩაყენება.  სიმპტომურ პაციენტებში უნდა დაიწყოს ივ ატროპინი (2 მგ-მდე) ან იზოპროტერენოლი. თუ ამ წამლებზე შედეგი არ არის, დროებითი კარდიოსტიმულაცია.

  • გრძელვადიანი მკურნალობა: მუდმივი პეისმეიკერის იმპლანტაცია. მნიშვნელოვანია გამოირიცხოს ბლოკადის შექცევადი მიზეზები.

  • თანდაყოლილი სრული ავ-ბლოკადა გამონაკლისი შემთხვევაა, როდესაც ჰოსპიტალიზაცია საჭირო არ არის. ამ შემთხვევაში მუდმივი პეისმეიკერის ჩვენება მხოლოდ მაშინ არის, თუ გამოხატულია სიმპტომები, ან აღინიშნება გულის კამერების დილატაცია, ქრონოტროპული უკმარისობა, კორეგირებული QT ინტერვალი > 460 მწმ, პარკუჭოვანი არითმიები ან იდიოვენტრიკულური რიტმი.

 

სრული AV-ბლოკადა

 

©2018 by Giorgi Papiashvili. Proudly created with Wix.com